كروسفت ؟ كثير منا يعرف ايش هي الكروسفت، بس هل فيه احد يعرف ايش قصتها ؟ كيف بدت وليش بدت ومتى؟ خلونا نرجع بالزمن يوم ما كان فيه شي اسمه كروسفت! خلونا نرجع لعام 1972! قديم صح ؟ طيب يلا نحكيلكم شوية من التاريخ.
فيه شخص اسمه (Greg glassman) كان لاعب جمباز من هو صغير، يوم كان بعمر الـ16 سنة كان يبغا يتطور ويصير اقوى مثل أي رياضي، كان دايما يبحث عن طريقة تخليه اقوى، وزي ما هو معروف برياضة الجمباز انها تعتمد بشكل أساسي على تمارين وزن الجسم في التقوية والتحمل، لكن وصل لمرحلة ان التطور بهالطريقة صار جداً بطئ خاصتا من ناحية القوة، فكان يشوف الرياضيين من رياضة كمال الأجسام ورفع الاوزان مستواهم عالي ومختلف من ناحية القوة، ولاعبين الرياضات الهوائية مثل ركوب الدراجات والسباحة والجري عندهم قدرة تحمل عالية، فقرر (Greg glassman) أنه يضيف في تمارينه رفع الأوزان وتمارين اللياقة عالية الجهد، بعدها حصل نتايج مختلفة عن أي برنامج رياضي قد جربه، ولاحظ أن القوة والتحمل تحسنوا بشكل كبير، وهذا اللي ساعده بعد فترة أنه يتفوق على كثير من لاعبين الجمباز، لكن بعضهم كان يتفوق عليه في بعض الاجهزة (اجهزة الجمباز اللي هي Rings, dip bar.. وغيرها.) لكن مو في غالبيتها.
في عام 1974 (Greg glassman) بدأ في مجال التدريب بعيد عن مجال رياضة الجمباز وكان يدرب في باسادينا، كاليفورنيا، بدأ يدرب عملائه بطريقة مختلفة، لأنه لاحظ أن تمارين اللياقة وكمال الاجسام تفتقر لخصائص كثيرة، فجرب أن التمارين تكون وظيفية تميل لحركة الجسم الطبيعية أكثر، مع جهد عالي، وتكون التمارين فيها تقوية ولياقة بنفس الوقت، ولاحظ أن التطور اللي نتج عنها كان جداً عالي مقارنة ببرامج التدريب الاعتيادية (كمال الأجسام واللياقة منفصلين عن بعضهم)، بدأ بعدد قليل جداً من العملاء بدأ بالتدريب الشخصي ثم بدأ يدرب مجموعات صغيرة ثم مجموعات كبيرة، لاحظ ان كثير من الناس صارت تهتم بطريقة تدريبه واستمر فيها وطورها وجذب عدد اكبر من الناس، وفي عام 1995 مركز شرطة سانتا كروز طلبوا منه بأنه يدرب اعضاء المركز، وثم بنفس العام افتتح اول نادي خاص فيه، واللي صار بعدين اول نادي كروسفت.
(Greg glassman) بعد ما اكتسب كثير من الخبرة قرر في عام 2000 انه ينشئ شركة الكروسفت مع (Lauren Jenai)، وبنفس العام افتتح ثاني نادي كروسفت في العالم اللي كان في سياتل واللي يعتبر اول نادي تابع لشركة الكروسفت.
بعد فترة صار يفكر كيف يقرب المجتمع لبعضه وينشر رياضة الكروسفت اكثر، وفي عام 2001 افتتح الموقع الالكتروني لرياضة الكروسفت عشان يقرب المجتمع ويزيد تفاعلهم بين بعض وبنفس الوقت قدر يوصل رياضة الكروسفت مو بس علي مستوى الولايات اللي بدأ فيها، قدر انه يوصلها لخارج الولايات المتحدة.
في ابريل عام 2002، (Greg glassman) نشر اول مقالة وكانت عن اساس او اساسيات الكروسفت، وفي شهر اكتوبر نشر مقالة (ماهي الرياضة؟) وكانت هاذي المقالتين بداية او مفتاح لدليل الكروسفت للمستوى الاول (Crossfit guide level 1)
في 2007 كانت سنة ولادة (Crossfit games) اللي الحين ينتظرها مئات الآلاف من الناس حول العالم اما كان للمشاركة في تصفياتها الـ (Open) للمتعة او المنافسة او لمشاهدة اقوى الرياضيين في العالم وهم يبهرون الناس بقدراتهم الرياضية العالية، او لحماس مفاجئة التمارين اللي كل سنة يزيد فيها التحدي اكثر واكثر، وكان عدد المشاركين في اول (Crossfit games) ٧٠ شخص وكانت الجائزة ما تتعدى ٥٠٠$
في عام 2019 وصل عدد المشاركين في الـ (Crossfit games) الى اكثر من 200 شخص من أكثر من 100 دولة مختلفة، وعدد المشاركين في الـ (Open) الى اكثر من 350 الف شخص من جميع انحاء العالم ووصلت الجواىز الى 200,000$.
والان الكروسفت تعتبر اسرع الرياضات انتشاراً، واكبر مجتمع رياضي يضم الناس من مختلف انحاء العالم.
